Ako ay Musang na 'non-combatant'

Noong kami ay mga kadete pa lamang sa PMA, pangarap na naming mapahanay sa First Scout Ranger Regiment na kilala bilang pangunahing yunit ng mga Dugong Mandirigma sa bansang Pilipinas.

Kadete pa lamang ako sa PMA, pangarap ko nang maging Scout Ranger. Bata pa lang ako, naririnig ko na ang mga kahanga-hangang kagalingan sa pakikidigma ng mga 'Iring' o 'Musang'. Naalala ko pa na kinakatakutan sila ng mga bandidong NPA na naglipana sa aming probinsya.

Kadete pa lang ako noon, pangarap ko nang maisuot ang Scout Ranger tab, Musang patch at 'Tabak' sa aking uniporme sa pamamagitan ng pagpa-assign sa First Scout Ranger Regiment at pagtapos sa napakahirap na Scout Ranger Course.

Panay SR tab at patch ang aking display sa aking locker noon. Kapag mag-tour ako dahil sa pagpapasaway, isinisigaw ko na lang pagkatapos ng "Ranger!" bilang pampa-high morale sa sarili.

Karagdagan pa nyan, mataas ang pagtingin namin sa mga Tactical Officers na Scout Rangers. Nagkataon naman na Tac-o ko sa Hawk Company noon si Cpt Dinoh Dolina ng PMA Class of 1985, isa sa mga nakapagtapos ng US Ranger Course. 

Lalong naging desidido ako noong 1993, nang bumisita sa PMA ang 'Living Legend' ng First Scout Ranger Regiment, si Colonel Julius Javier. Napakarami ng kwento ang naririnig namin tungkol sa kanyang combat accomplishments noon. Bayani ang tingin namin sa kanya.  

Kaya naman, noong 1994 na kung kailan kami ay mga 'young and dashing' 2nd Lts, isa lang ang aking gustong yunit nang pinaglista kami sa Army headquarters ng aming priority unit assignment.

Maalala ko ang  13 na mga yunit ang aming pagpilian na mapuntahan: Eight (8) Infantry Divisions, First Scout Ranger Regiment, Special Forces (Airborne) at Light Armor Brigade.

Sa sistemang prioritization, isulat mo ayon sa pagkasunod-sunod ang gustong mapuntahang yunit. Halimbawa kung pinakagusto ay FSRR, ilagay ito sa number 1, and so forth. Syempre, ang gusto ko ay Scout Ranger unit at hindi lamang magiging Scout Ranger graduate. Magkaiba yon eh.

Dahil nga sa die hard Scout Ranger ako, sinubukan kong magpasaway. Ito ang aking nilagay sa aking papel na ipinasa:

Name: 2nd Lt Harold M Cabunoc (Inf) PA

Order of Priority:

1.    First Scout Ranger Regiment

2.    First Scout Ranger Regiment

3.    First Scout Ranger Regiment

4.    First Scout Ranger Regiment

5.    First Scout Ranger Regiment

6.    First Scout Ranger Regiment

7.    First Scout Ranger Regiment

8.    First Scout Ranger Regiment

9.    First Scout Ranger Regiment

10.  First Scout Ranger Regiment

11.  First Scout Ranger Regiment

12.  First Scout Ranger Regiment

13.  First Scout Ranger Regiment

At may dinagdag pa akong pa-cute:  "Rangers Lead the Way!"

IDOL WARRIOR. Ang aking iniidolo sa larangan ng pakikidigma na si Major General Julius Javier, ang dating Regiment Commander ng First Scout Ranger Regiment from 1991-1998. Sya ang tinatawag ng mga Rangers na 'The Living Legend' dahil sa kanyang kakaiba at minsan ay di kapani-paniwalang kagalingan sa larangan ng pakikidigma kahit saang sulok man sa ating kapuluan. Kasama sa larawan ang kanyang anak na si Cpt Julie Javier ng PMA Class 2004.

Mismong ang legendary Scout Ranger warrior na si Col Julius L Javier ang pumili ng mga opisyal mula doon sa sobra 40 na nag-volunteer na sumanib sa FSRR na kanyang pinamunuan.

Katatapos namin sa Scout Ranger Orientation Course sa FSRR noon nang sya mismo ang nagbasa sa mga napili nyang maging Musang. Grabe ang dasal ko na masama ang aking pangalan nang paisa-isa nyang tinawag ang mga pangalan.

"Ranger Cabasan. Ranger Criste. Ranger Derilo. Ranger Pagayon. Ranger Almodovar."

Parang pakonti-konti na lang natira sa slot wala pa rin ang pangalan ko. 

"At....kasama si Ranger Cabunoc!"

Syempre parang success ako don. Kasama ako sa maging Musang!

Kasama sa kinuha ay ang PMA Class 94 Salutatorian at "Army Class Marcher" na si Manny Cabasan at ako na nagtapos bilang pinakahuli o 'Class Goat'.

Ewan kung na-challenge sa aking pagiging mapangahas na pasaway, isa ako sa handpicked na magiging kasapi sa elite unit ng mga mandirigma. By the way, parehas kaming Class Goat ni idol Col. Julius Javier.

Meron ding apat na mula sa Officer Candidate School Class 11-94 ang pinili. Ito ay sina Jun Claros, Jake Paler, Jun Gaminde at DJ De Joya.

Labing lima kaming kinuha ng FSRR:

1. 2nd Lt Clifford Cordova

2. 2nd Lt Harold Cabunoc

3. 2nd Lt Emmanuel Cabasan

4. 2nd Lt Isagani Criste

5. 2nd Lt Roy Anthony Derilo

6. 2nd Lt Rommel Pagayon

7. 2nd Lt Frederick Sales

8. 2nd Lt Montano Almodovar

9. 2nd Lt Ruben Guinolbay

10. 2nd Lt Joey Fontiveros

11. 2nd Lt James Sababan

12. 2nd Lt Isaias Claros

13. 2nd Lt Jake Paler

14. 2nd Lt Epifanio Gaminde

15. 2nd Lt DJ Dejoya

Agawan ng assignment

Nang pinag-report kami sa FSRR noong January 1995, sinigurado kong dumating na mas maaga sa termination. January 3 pa lang, nasa FSRR headquarters na ako sa Fort Bonifacio. Malay ko ba kung ma-slash ang sino mang ma-'bad shot' di ba?

Batid ko rin na 12 lamang ang Scout Ranger Companies. Tatlo rito ay nasa Mindanao kagaya ng 1st SR Company na pinamunuan ni Cpt Cirilito Sobejana, 4th SR Company na pinamunuan ni 1st Lt Angel Sievert at ang 6th SR Company na pinamunuan ng isa pang legendary warrior na si Cpt Robert Edward Lucero.

Ang problema, halos lahat kami ay gustong mapunta sa Mindanao, lalo na sa Basilan. Nag-aagawan kaming mapunta sa frontline bilang Platoon Leader. Alangan namang garrison ang gugustuhin namin! 

Dahil sa agawang ito, ang ginawa ng aming Personnel Officer (G1) na si Cpt Rene Glen Paje ay 'draw lots' kami kung sino ang ma-swerte na mapunta sa assignment na may gyera. Totoo yon, ang yunit na may gyera ang pinag-aagawan naming mapuntahan.

Nang bunutin ko ang aking papel, napasigaw ako ng 'Eureka!'. Nakuha ko ang 1st Scout Ranger Company na nakadestino sa Basilan. Sobra na akong excited na sumabak sa tunay na gyera!

Feeling proud, nagkamayan at nag-high fives na kami ng aking PMA beast barracks squadmate na si Manny Cabasan na sya namang nakakuha ng 4th Scout Ranger Company.

"Magka-buddy tayo doon sa Basilan, squadmate. Mapapasabak tayong sabay nito!" 

Kinaumagahan, pinatawag ako ni Cpt Paje para sa importanteng instruction.

"Mister Cabunoc, powerlifter at judo player ka pala. Mas maiging dito ka muna sa headquarters sa Fort Bonifacio para turuan ang mga bata ng weights training program at combative sport," sabi nya.

Nagulantang ako. Parang gumuho ang mundo. Parang nasalanta ako ng bagyo. Low morale ako.

"Pero sir, ang nabunot ko ay 1st SRC na nasa Basilan," paliwanag ko at appealing to pity pa.

"Sinabi ko na nga ang dahilan eh. Di mo naman matatapos ang gyera dyan sa Basilan kung pupunta ka doon. Bukas, gusto ko ipresent mo sa akin ang weights training program ng mga tropa natin," nakakunot na ang noo ng aming G1. 

Kamot-ulo ako sa nangyari kasi hindi yon ang aking inaasahan. Gusto ko na agad makapiling ang mga mandirigma sa field at makatulong sa combat-rescue missions na ongoing sa Basilan sa mga panahon na iyon.

Si Lt. James Sababan ang pumalit sa akin na magiging Platoon Leader ng 1st Scout Ranger (We Dare) Company. 

Non-combatants

Pagbalik namin sa barracks, grabe ang tawanan ng lahat lalo na yong mga ma-assigned sa field. Sino ba naman ang happy na assigned nga sa Rangers eh, mataguriang 'headquarters boys' at 'non-combatants'?

Kasama ko sa napabilang sa 'non-combatants' (ayon sa kantyaw ng aming mistah na si Lt Ruben 'Gino' Guinolbay) ay sina Gani Criste, Mon Almodovar, Clifford Cordova at si Rommel Pagayon.

Instead na nakikipagbabakan kami sa bundok, napapasabak kami sa mga parada. Tuwing hapon ay nasa weights room naman ako upang turuan ang aming mga sundalo sa tamang pag-gamit ng mga kagamitan doon. Kapag umaga ay nakikipag-sambuno ako sa iilang tropa para magturo ng basic throwing at grappling techniques ng judo.

Iilang linggo lang ang lumipas, inggit na inggit kami pag nababasa namin na napapasabak na sa Basilan sina Manny Cabasan at James Sababan. Matiyaga kaming nakikinig sa URC 187 radio tuwing nagbabalitaan tungkol sa bakbakan noon sa Basilan na kung saan ay magkasunod na malubhang nasugatan ang mga mandirigmang Company Commanders na sina Cpt Sobejana at 1st Lt Sievert. 

Dahil wala kaming magawa sa sitwasyon, ika nga ay pinaganda na lang namin ang aming kalagayan. Bilang paghahanda sa aming schooling, nagpalakas kami ng aming pangangatawan sa mga physical training activities. Sumasabay kami sa mahahabang takbuhan ng mga Musang na nasa garrison. Katagalan, natuto at na-enjoy rin kami sa mga kalokohang pang-Musang na chanting na kagaya nito:

"Tsaa, kapi, tsukulati. Tsaa kapi na may bulati! Rinjir, uwaa. Irburn. Uwaa!"

Sa una lang tila ay nababagot ako. Kasi naman pre, instead na M16 Rifle ang aking binubuhat, dumb bells at barbells ang inabot ko! Enebeyen!

Sa totoo lang, parang gusto kong maluha sa aking sinapit ngunit pinag-igian ko na lang ang pagiging weights training instructor sa mga payatot na Rangers na kalimitan ay sa takbuhan lamang malalakas. 

Ang kagandahan, natuto akong makisalamuha sa mga musang (Ranger warriors). Karamihan sa kanila ay mga beterano na sa mga bakbakan. Natutunan ko paano dalhin ang isang Pilipinong sundalo. Hindi namin natutunan iyon sa PMA na panay kadete din lang ang pinamumunuan namin.

Para maliwanagan sa totoong buhay sundalo sa field, sa mga beteranong Musang ko itinatanong ang mga karanasan nila sa mga bakbakan at pati sa mga challenges sa field. Naririnig ko sa kanila pati kwento ng mga diumano ay mga palpak na lider at mga iniidolong lider. Napag-alaman ko na inaabangan nila ang baptism of fire ng mga bagong tenyente. Inoobserbahan nila kung natataranta ang mga ito at namumutla sa gitna ng nagliliparang bala. Syempre, pulutan ang Segunda Kamote na mataguriang 'talawan' ng mga Bisaya o 'tagirgir' ng mga Ilokano.

Dahil may mga magandang napupulot din naman ako sa aking trabahong garrison, tiniis-tiis ko muna ang pagiging 'Non-Combatant'. 

'NON-COMBATANTS' NO MORE. Kasama ko sa larawan ang dalawang mandirigmang sina Erick Sales (kaliwa) at Clifford Cordova sa aming pakikipagsapalaran sa lalawigan ng Sulu. Si Lt Sales ay naging Best Company Commander at multi-awarded ng Gold Cross Medal, samantalang si Lt Clifford Cordova ay nakatanggap ng dalawang Distinguished Conduct Star maliban sa sangkaterbang Gold Cross Medals dahil sa kanilang napakaraming combat accomplishments sa Mindanao. Si Clifford ay kasama ko sa orihinal na mga 'non-combatants' noong January 1995. (10SRC photo)



(Sa susunod na kabanata, malalaman nyong merong nakatagong opportunities ang aming sinapit na kapalaran bilang 'Makati warriors' at 'headquarters boys'.)